O desenvolvemento deste software ten a súa orixe nos problemas de rendemento das aplicacións Hadoop, causados principalmente polo uso excesivo de copias en memoria e operacións de E/S a disco. Flame-MR cambia o motor de procesamento de Hadoop baseado en disco por unha arquitectura dirixida por eventos que permite maximizar a computación en memoria e reducir así os tempos de execución das aplicacións.

Malia existiren solucións alternativas no ámbito dos macrodatos (big data) como Spark ou Flink, o código fonte das aplicacións Hadoop debe adaptarse ás novas API, o que pode supoñer un gran custo en termos de tempo e esforzo. Alén disto, en ocasións o código fonte das aplicacións non está dispoñible de forma pública, o que imposibilitaría a devandita adaptación. Flame-MR permite reducir os tempos de procesamento sen necesidade de modificar o código fonte escrito, polo que a súa implantación é inmediata e sen ningún custo de desenvolvemento.