O sistema patentado permite construír sistemas estruturais porticados mediante diferentes elementos fáciles de acoplar entre si, para o cal se usan seccións singulares que permiten unha cómoda paletización do conxunto. Conséguese desta maneira resolver un sistema que posibilita unha almacenaxe simple, cun volume mínimo, e facilita o transporte cara ao punto de erección.

A configuración formal dos elementos permite fabricalos con diferentes materiais que admitan a laminación e/ou a extrusión (aceiros, plásticos…), de tal maneira que posibilita calquera rango de sistema estrutural.

Como parte esencial no desenvolvemento da patente incluíronse algunhas das diferentes configuracións posibles do sistema, que inclúen unha peza telescópica de soporte da cal é posible despregar mediante xiro unha ménsula aloxada no extremo superior. Despregadas estas ménsulas entre soportes enfrontados é posible encaixar a peza de lintel que conforma a viga ou o elemento horizontal que completa o pórtico.

A sección de dobre perfil que conforma o soporte permite aloxar no seu interior tanto a ménsula como o lintel. O xiro posible da ménsula e a combinación de alturas e lonxitudes permite calquera configuración e pendente, para adaptarse ás necesidades concretas de cada pórtico.