Esta tecnoloxía ten por obxecto resolver os problemas que adoitan darse na construción de estruturas porticadas, mediante un módulo compacto, de reducido volume, de fácil transporte, almacenamento e manipulación, cunha serie de compoñentes que permiten, mediante operacións sinxelas, conformar o devandito tipo de estruturas.

O módulo inclúe un soporte de tipo telescópico que, con só facelo esvarar, chega a alcanzar unha altura de até o dobre da que ocupa en posición compacta ou recollida. Incorpora ademais un conxunto de pezas que, por simple xiro, constitúen ménsulas que poden adoptar distintas inclinacións, o que permite resolver a estrutura tanto de pisos como de cubertas, con ou sen pendente, que se completan con tramos intermedios de vigas que se unen ás ménsulas despregadas.

A gran vantaxe deste sistema é o seu carácter compacto, que xorde da relación dimensional entre as súas diferentes pezas. A adecuación formal que presentan estas pezas, combinada cos movementos de extensión e xiro dalgunha das súas partes, permite conseguir un paquete compacto moi doado de almacenar e transportar.