Nos últimos anos a contaminación atmosférica converteuse nun fenómeno de grande interese no ámbito mundial, debido aos seus efectos na saúde da poboación e a como afecta á calidade do aire e ao clima. Xorden así diferentes grupos de investigación e traballo en distintos países co obxectivo de realizar estudos e medicións dos distintos contaminantes atmosféricos en diversos escenarios, para comparar os resultados obtidos e construír bases de datos con información que permita analizar o estado da cuestión.

SCALA é un software que dá soporte a estas actividades, ao asistir a quen del se sirva nas tarefas de convocatoria das campañas de mostraxe, construción dun repositorio de datos ambientais e análise de tales datos. Até o desenvolvemento do dito software, non existía ningunha ferramenta de tal tipo e que abranguese o proceso completo desta clase de campañas.

Proceso de desenvolvemento, funcionalidades básicas do software e caso de estudo publicados no artigo «Web Application for Atmospheric Aerosol Data Management: Software and Case Study in the Spanish Network on Environmental Differential Mobility Analysers» (DOI: 10.3390/atmos10050279).